Acara Partangiangan

Dipinpin Oleh :  -  Pdt. Rich Juraltri Simamora 
                                (Pendeta Resort HKBP Sigalingging)

                             -  Pendeta Resort HKBP Doloksanggul Kota 
                                (Pdt. Rudolf Purba STh)

                             -  Pendeta Resort HKBP Resort Saitnihuta 
                                ( Pdt.   Gultom, STh)

                             -  Uluan HKBP Aeklung 
                                ( St. Edison Simamora)

                             -  Pendeta Gereja Siloam Desa Aeklung  
                                (Pdt.    Simamora)

                             -  Guru Huria Gereja Katolik Desa Aeklung 
                                ( St. Marsius Simamora)

Dan diikuti Oleh :   -  Seluruh Warga Desa Aeklung

    

Hasuhuton HKBP Aeklung

ACARA KEBAKTIAN

PARTANGIANGAN MARHANALOMHON DEBATA

DOHOT

MANGONDIHON PANGISI NI LUAT AEKLUNG

SABTU, 11 MARET 2017

Di : LAPANGAN DESA AEKLUNG

L : Liturgis        S : Sude na torop

01.           Joujou tu Partangiangan

L       :  SYALOM ! Horas ma di hita saluhutna

S    :  Syalom! Horas ma nang di hamu

L`    :  Diparpunguanta sadari on, tama do hita mandok mauliate dohot mamuji Debata ala ni asi ni roha dohot denggan basa ni  Debata di hita saluhutna. Nunga dipatuduhon  Debata hagogoon dohot huasoNa namangatasi sude nasa hagogoon dohot huaso ni portibion. Nunga di ondihon hita sian namanonggoti hita, jala dilehon tu hita hahipason dohot tiur ni roha. Nunga ditumpakhon tu hita na tau gabe hangoluan dohot haluaonta jala dilehon tingki lao marpungu dohot marsaor marhitehite partangiangantaon. Siala ni i, tangkas ma tapasahat puji-pujian dohot hamauliateon ni rohanta tu Tuhanta.

S     :  Haleluya, Pinuji ma Debata na sai tongtong mangaramoti jala patauhon hita di sude panggulmiton ni ngolunta.

L          :  Hamuna angka dongan na hinaholongan di bagasan Jesus Kristus, taparade ma roha dohot pingkiranta martangiang tu Debata, asa dituturi, diramoti jala dipasupasu hita dinamamungka sahat tu na mangunjungi partangiangan on. Alani i, martangiang na hohom ma hita di bagasan rohanta be.

R          :  (Martangiang dibagasan rohana be / Saat teduh)

L          :  ….. Amen!   Antong tapuji jala tapasangap ma Ibana na sun timbul jala parholong i marhite na marende hita :

02.           Marende BE No.565 : 1, 3 – 4  “Las rohangku lao mamuji”

1).     Las rohangku lao mamuji Debata parholong i. Songon bunga na mangerbang di na binsar ari i. Arsak, dosa, haporsuhon mago di baen asiMi. Las ni roha na manontong lehon di au Tuhanhi.

3).     Debata parholong roha na manesa dosangki. Ndang tarbaen so las rohangku lao mamuji  asiMi. Sai ajari sude hami mangulahon holong i. Asa gok las rohanami di bagasan Tuhan i.                (Musik --- jongjong)

4). Rap ma hita mangendehon sangap di GoarNa i. Tapangiar soaranta lao mamuji Tuhan i. Sun do holong ni rohaNa na so marnamontok i. I do pasadahon hita salelenglelengna i.

03.           Votum – Introitus – Tangiang :

L          :  Marhitehite goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on.

S          :  Amen.

L          :  Ho do, ale Jahowa, dihalungunhon rohangku. Ale Debatangku, marhaposan tu Ho do ahu, unang tung paila ahu, asa unang marsuraksurak angka musungku mida ahu.

S          :  Ndang tahe tagamon tarurak sude angka na mangkaposi Ho, sai maila do sogot angka pangose soada alana.

L          : Ale Jahowa, sai pabotohon ma tu ahu angka dalanmu, jala ajarhon tu ahu angka bogasmu.

S          : Sai togutogu ma ahu tubagasan hasintonganmu, jala ajari ahu, ai Ho do Debata ni hatuaonku, Ho do na huhaposi ganup ari.

L          :  Sai ingot ma, ale Jahowa, angka denggan ni basam dohot asi ni roham, ai sian na robi do angka i. Haleluya, Martangiang ma hita :

                Ale Tuhan Debata, Pargogo na so hatudosan! Holan ala asi ni rohaM sambing do, umbahen na tarbahen hami marpungu di joloM, marsada ni roha martangiang tu Ho. Diparbagabga Ho do di bagasan hataM : Molo adong dua manang tolu halak marpungu marhitehite goarMu, lehononMu do na pinangido nasida. Ale Tuhan pasaut ma bagabagaMi, tangihon ma pangidoannami, lehon ma na tau hangoluannami. Lehon ma di hami saleleng di hasiangan on parbinotoan di hasintonganMi  dohot di hangoluan  salelenglelengna marhitehite AnakMu, Tuhan Jesus Kristus, Tuhannami. Amen.            (Hundul)

04.           Marende BE No. 714 : 1 – 2  “Tuhan na marmahan hami”

1).     Tuhan na marmahan hami togu hami ruasMon, lehon dameMi di hami angka na hinophopMon. Tuhan Jesus Sipalua, ndang tarasam holongMi Tuhan Jesus Sipalua, ndang tarasam holongMI.

2).     Tuhan parmahan haposan, dongan na Sumurung i. Sai padao pangunjunan, togu ma na lilu i. Tuhan Jesus SiPalua pasupasu ruasMi. Tuhan Jesus SiParmahan, parmahani ruasMi.

05.           Manjaha ma hita sian Hata ni Debata : ima sian Psalmen 57 : 2 - 12

L          : Sai asi ma roham di ahu, ale Debata, asi ma roham di ahu, ai marhaporusan tu Ho do rohangku, jala di * linggom ni habongmi do ahu marondingonding, paima * salpu parmaraan i.

S          :  Sai mangalualu tu Debata na tumimbul i do ahu, tu Debata, siluluhon ahu.

L          : Tongoshononna do sian banua ginjang, asa manumpahi ahu, paurahonna do na naeng mamolgak ahu

S          :  Tongoshonon ni Debata do asi ni rohana dohot hasintonganna.

L          :  Di tongatonga ni angka singa do hosangki, marsaro do ahu di tongatonga ni angka na gara marroha, angka jolma manisia, doshon hujur dohot sumbia do iponnasida, jala doshon podang na tajom do dilanasida i.

S          :  Sai patimbul ma dirim, ale Debata, tu atas ni langit, hamuliaonmu, tu sandok tano on.

L          : Nunga ditaon nasida jorgong di langkalangkangku, nunga tarjimput rohangku; nunga dihali nasida di jolongku sada godung, hape nasida sandiri madabu tubagasan.

S          : Nalom do rohangku, ale Debata, nalom do rohangku, sai marende ma ahu huhut umpalu parhinaloan.

L          :  Ngot ma ho, ale saudarangki tondingki, ngot ma ho ale parhinaloan! Tarsunggul ma ahu buha siang ari.

S          :  Pujionku ma Ho, di tongatonga ni angka bangso, ale Tuhan, endehononku ma Ho di tongatonga ni angka marga.

L          :  Ai timbul do sahat ro di langit asi ni roham, jala tolhas ro di auangauang do hasintonganmu.

S          :  Sai patimbul ma dirim tu atas ni langit, ale Debata, hamuliaonmu tu sandok tano on.

L+S     :  Pujionku ma Jahowa sian nasa roha di luhutan ni angka partigor dohot di huria i.

L          : Olat ni ima sahatna: Martua do na tumangihon Hata ni Debata jala naumpeopsa. 

L + S   :  Amen

06.           Marende BE No. 467 : 1 + 3 “Asi ni RohaM Hupuji”              

1).     Asi ni rohaM hupuji, ala Ho manobus au. Dipaias ho rohangku Gabe sorangaMu au. IngananMu rohanami, TondiMi manggohi i. Pangke dohot ngolunami gabe ulaulaMi.

3).     Naeng huhatindanghon hami hagogoonMi tongtong. Paluahon namardosa, nang parjahat na bolong. IngananMu rohanami, TondiMi manggohi i. Pangke dohot ngolunami gabe ulaulaMi.

07.           Panindangion di Pandonganion ni Debata :

L          :  Hamuna angka dongan na hinaholongan, tama do tutu hita mandok mauliate sadarion, molo taingot sude asi ni roha dohot pandonganion ni Tuhanta di hita ganup marsadasada, di keluarganta, laos songon i tu  luatta Aeklung on, manipat sahat sahat ro di sadarion. Ala ni i taolophon ma Jahowa mandok.

S          :  Puji ma Jahowa ale tondingku, jala nasa rohangku di bagasan mamuji goarNa na badia i.

L          :  Di angka pamoluson dohot pardalanan ni ngolunta i, marragam do na taadopi. Sipata do ro angka parsaulian dohot angka paruntungan namambahen las rohanta. Alai sabalikna muse, sipata ro do angka sipingkiran dohot siparungkilhononta na mabahen jut jala marsak rohanta. Alai molo taadopi pe na songon i tongtong ma tasoarahaon:

S          :  Manang aha pe na masa, las ni roha arsak pe. Tioponku Ho na basa namarholong roha pe.Tung saleleng au mangolu, nang suda bohalhon. Ingkon Ho , o Sipangolu, pujionku sai tongtong.

L          :  Di bagasan partingkian dohot na masa, godang do namambahen hita tarsonggot, targogot, mabiar jala mambahen roha bohaboha on. Ai nunga godang masa na so hea masa, lam ngali holong ni roha, lam dao dame dohot sonang ni roha. Jotjot do na masa i mambahen lilu haporseaonta ala so binoto be dalan sitondongonta. Alai masa pe na masa i jouhononta ma :

S          :  Sipata lilu haporseaonhu, nililianan ni portibi on. Alai dung Ho Hutatap, o Tuhanku, margogo do au on di ngolungkon. Huboto do tangkas panoguonMu, diringiring ho do langkangki. Sahat ro di ujung ni pardalanhu, togu ma au jonok tu lambungMi.

L          : Di angka na taadopi di ragam ni panghilalaan dohot na masa tu ngolunta, tapapos  ma rohanta jala manghirim ma hita di asi ni roha ni Tuhanta; molo Debata donganta ise be alonta, nda dohononta ma disi : ”Saluhut do tarpatupa ahu marhitehite Jesus na margogoihon ahu”. Amen

08.           Marende BE No. 815 : 1   “Uli  do tingki na hohom”

1).        Uli do tingki na hohom, pasahat pangidoanki, Tu Debata na bonar I, sitangihon tangiang i. Di na huida bohiMi porsea au dihataMi, Tompas holso ni rohangki, di tingki martangiang i.

09.           Tangiang Pangondianon Mewakili sian Huria-huria : (Jolo di jahahon Sipartangiang i ma panindangion na tarsurat i, ipe asa martangiang)

10.           Tangiang Pangondianon na mewakili sian HKBP AEKLUNG

Sipartangiang : Psalmen 121 : 1 – 8

Sai mangaranapi do matangku dompak angka dolok: Sian dia do ulaning ro pangurupion tu ahu?

Sian Jahowa Sitompa langit dohot tano on sambing ro pangurupion ianggo tu ahu.

Ndang tagamon loasonna tarsulandit patmu, ndang tagamon nok mata ni Sijaga ho.

Ida ma, ndang olo nok mata, jala ndang olo modom ianggo Sijaga Israel.

Jahowa do Sijaga ho, Jahowa do parlinggomanmu di lambung ni tanganmu siamun.

Ndang tagamon doiton ni mata ni ari ho arian, manang bulan pe bornginna i.

Sai jagaon ni Jahowa do ho sian nasa parmaraan, sai jagaonna do tondim.

Sai jagaon ni Jahowa do ho laho ruar dohot laho bongot, olat ni on ro di salelenglelengna. Martangiang ma hita :

11.           Tangiang Pangondianon na mewakili sian Katolik

Sipartangiang : Psalm 43 : 1 – 5

Luluhon ahu, ale Debata, jala badahon badangku dompak bangso na so daulat, sai palua ma ahu sian baoa siulahon sipaotooto dohot hajengkelon.

Ai Ho do Debata ni hagogoonku, boasa tung ambolongkononmu ahu? Boasa ingkon sai martujungtujung ahu mardalan binahen ni pangarsahi ni musu?

Tongoshon ma hatoranganmu dohot hatigoranmu, angka na manogu ahu, pataruhon ahu tu dolok ni habadiaonmu dohot tu ingananmu.

Asa tung masuk ahu tu langgatan ni Debata, tu Debata * silas ni rohangku, asa hupuji Ho mardongan parhinaloan, ale Debata, Debatangku tongon.

Boasa sai tungki ho, ale tondingku, jala sai rusak di bagasan ahu? Haposi ma Debata, ai sai na pujionku dope Ibana, hatuaon ni bohingku jala Debatangku. Martangiang ma hita :

12.           Tangiang Pangondianon na mewakili sian HKBP Saitnihuta.

Sipartangiang :  Jesaya 12 : 1 – 6

Jadi dohononmu ma di ari na sasada i: Mauliate ma ahu tu ho, ale Jahowa, ala dirimasi ho ahu, alai nunga marpamuati rimasmu, jala nunga diapuli ho ahu.

Ida ma, Debata do hatuaonku, Ibana huhaposi, jadi ndang mabiar ahu, ai Tuhan Jahowa do hagogoonku dohot pujipujianku dohot manjadi hatuaon di ahu.

Jadi marlas ni roha hamu manahui aek sian * mual ni hatuaon.

Jadi dohononmuna ma di ari na sasada i:  Puji hamu ma Jahowa, jala jou hamu ma goarna, pabotohon hamu angka jadijadianna di tongatonga ni angka bangso, jamitahon hamu goarna na timbul i.

Endehon hamu ende pujipujian tu Jahowa, ai nunga dijadihon halongangan, sibotoon ni liat portibi on sogot.

Marolopolop jala mariaia ma ho, ale isi ni Sion, ai timbul do di parsitongaanmi na badia ni Israel. Martangiang ma hita

13.           Tangiang Pangondianon na mewakili sian Siloam

Sipartangiang :  Mika 6 : 6 – 8

Marhitehite aha tarbahen ahu mandapothon Jahowa, marsomba ahu tu Debata na di ginjang? * Marhitehite angka pelean situtungon ulaning ahu manjumpangkon ibana marhitehite anak ni lombu, angka na marumur sataon ulaning?

Lomo do ulaning roha ni Jahowa mida hambing tunggal marriburibu? Manang mida angka sunge miak marloksaloksa? Lehononku do ulaning anak buhabajungku abul ni pangalaosingki? Parbue ni butuhangku ulaning abul ni dosa ni rohangku?

Nunga dipabotohon ibana tu ho, ale jolma manang aha na denggan, jala manang aha * na niluluan ni Jahowa sian ho, nda holan * na mangulahon uhum dohot holong ni roha di habasaon, jala marpangalaho haserepon maradophon Debatam. Martangiang ma hita :

14.           Marende BE No. 743 : 1 – 2 “O Tuhan togu-togu ma”

1).     O Tuhan togu-togu ma au tu dalan lomo ni rohaMi. Raphon Ho sonang mardalan au, nang rahis maol sidalananki.TondiMi baen manggohi au on, margogoihon au naposoMon.Pasangap Ho di ngolungkon, paima sahat tu surgo au on.

2).     Panghulingi ma au O Tuhan na rade tumangihon hataM. Sai tumpahi ruasMu Tuhan na uasan nuaeng di hatam, Sai patau ma au on naposoM manjou halak na dao sian Ho. Ro di na so tumanda Ho muba gabe pangoloi di Ho.

15.           Jamita   :

16.           Marende Be No. 66 : 1 – 3 “Debata baen donganMi” (Papungu Pelean)

1).     Debata baen donganmi, lao mangula ulaonmu. Baen Ibana haposanmu, sai paserep rohami.Debata baen donganmi.Debata baen donganmi.

2).     Debata baen donganmi, molo Debata donganmu. Ndang tarbahen ho be lilu, sai ture do langkami. Debata baen donganmi.Debata baen donganmi.

3)      Debata baen donganmi, sai na saut do ulaonmu. Sai na tulus do sangkapmu, jala sonang rohami. Debata baen donganmi.Debata baen donganmi.

17.           Pengutusan  :

P       :  Nunga simpul partangiangan na marhanalomhon Debata dohot mangondihon sude pangisi ni Luat Aeklung na tapatupa di bagasan tingki on. Alani, jangkon hamu ma dibagasan haporseaon nang togu Hata ni Debata naung tatangihon sadarion. Asi ma roha ni Tuhanta, sai dipargogoi ma hita laho mangulahon angka lomo ni rohaNa asa marsangap Debata dibagasan Jesus Kristus di sandok panggulmiton ni ngolunta.

R       :  Ale Debata Ama, Anak, dohot Tondi Porbadia, sai parrohai jala pargogoi ma hami mangulahon HataM Naung hutangihon hami sadarion.

18.           Tangiang Panutup / Ale Amanami / Pasupasu / Amen-Amen-Amen

(…………………….. ndung sidung Kebaktian, tajalangma siamun – sihambirang dohot na jonok tu hita……………………………………)

Syalom, horas.

Martantan ma baringin, marurat jabijabi

Pir ma tondi madingin, tumpahon ni tuhanta mula jadi.

Eme sitamba tua parlinggoman ni si borok

Debata do silehon tua, sude ma hita diparorot

Panurirang do mual ni parbaritaon jala apostel do mual ni parajamitaon

Debata do mual ni hangoluan, jala sude ma hita ditogu tu hangoluan.